Bama

This folktale (nsiirin) comes from Bazin's "Dictionnaire bambara-français" from 1906.

Bama ko: "Kɔngɔ bɛ n na."
Bama ni à denw tagara yaala ka fɛn ɲini. Ji jara ka bɔ u kɔrɔ.
Donsokɛ nana. À ko: "Bama, mun ye ji ja i kɔrɔ?"
À ko: "N nana yaala, ji jara ka bɔ n kɔrɔ."
Donsokɛ ko: "Ni i ka fitiriwaleya tɛ, n na taga i bila ji la."
À ko: "N ta. N tɛ fitiriwale ye."
Donsokɛ ye fu bɔ, à ye bama siri ka à da à kun kan, ka à denw cɛ, ka taga ni u ye ba da la. À ko: "Bama, n ka i bila yan wa?"
À ko: "Taga ɲɛ dɔɔnin."
À tagara fo ji ye à minɛ à kunbere la. À ko: "N ka i bila yan wa?"
Bama ko: "Ɔwɔ, n bila yan."
Donsokɛ ye à foni ka ale ni à denw bila ji la.
Bama ye à minɛ à sen ma; à ko: "N na i kɛ ka n ka kɔngɔ bɔ."
À ko "N bila dɛ!"
Bama ko: "N tɛ i bila koyi!"
Donso ko: "N ko i ye fitiriwale ye."

Nsonsan nana. À ko: "Donsokɛ, i jɔlen bɛ yan munna?"
À ko: "N bɛ bama bolo."
Nsonsan ko: "Bama ye e minɛ mun na?
À ko: "Ne tun tagara ba da la, ji jalen tun bɛ ka bɔ bama ni à denw kɔrɔ. N ko ni à fitiriwaleya tɛ, ne tun na à ta ka taga à bila ji la. À ko n ka à ta; n ko n tɛ à ta, à na n dun. À ko: 'Anw tɛna i dun'. Ne ye à ta ka à bila ji la, à ye n minɛ n sen ma. N ko à ka n bila; à ko ko à tɛna n bila.
Nsonnanin ko: "E bɛ se bama kɔrɔ ani à denw wa?"
À ko: "N bɛ se à kɔrɔ."
Nsonsannin ko: "Bama, à fɔ ko o ye tiɲɛ ye."
Bama ko: "Ɔwɔ, tiɲɛ don."

Nsonsan ko: "Ne tɛ da o la, fo i ma à ta n ɲɛ na; bama i sɔnna wa?"
Bama ko: "N sɔnna."
Donsokɛ ye à siri ka taga ni à ye à nɔ na.
Nsonnanin ko: "À faga sisan."
À ye à faga, ka taga ni à sogo ye à ka so. Kabini o kɛra, mɔgɔ si ma bama ta ka à bila ji la.